Zaměry a temy casopisa

Casopis „Lětopis“ wózjawja wědomnostne nastawki k sorabistiskim temam a nastawki na pólu pśirownujucego mjeńšynowego slěźenja kaž teke recensije, we kótarychž wó te tematiske póla źo. Casopis jo myslony za wědomnostnice a wědomnostniki, kótarychž slěźenja - lěc na swójich fachowych pólach abo interdisciplinarne - maju póśěg k Serbam, abo kótarež pytaju za informacijami, ako su za te slěźenja relewantne.

Klucowe słowa: sorabistika, górnoserbšćina, dolnoserbšćina, słowjańskie rěcy, mjeńšynowe slěźenje

Serbski institut wudawa „Lětopis” ako interdisciplinarny periodikum na pólu sorabistiskego a humanistiskego slěźenja. Casopis jo se załožył w lěśe 1952. Wón se wudawa wót lěta 2023 online a z pódtitelom „Casopis za sorabistiku a pśirownujuce mjeńšynowe slěźenje”. Pśiwzete artikele wózjawiju se online, kuždy wósebje, a slědkoju teke wšykne gromaźe we śišćanej formje ako lětna publikacija.

Publikaciske rěcy su: dolnoserbska, górnoserbska, nimska a engelska rěc kaž teke dalšne słowjańske rěcy, pśedewšym pólska, čechojska a rusojska.

Open Access

„Lětopis“ jo casopis z formatom diamond open access (Diamond OA). To wóznamjenijo, až jo dermotnje pśistupny, a njenastanu žedne publikaciske płaśonki (APC, Page Charges, Colour Charges atd.). Wšykne wopśimjeśa su njepósrědnje pó wózjawjenju lichotnje pśistupne. Casopis jo pó kooperaciskich strukturach organizěrowany, w akademiskem nosaŕstwje a njekomercielny. Dopołny material wózjawijo se z CC-licencu, wóloneju wót awtorkow a awtorow, pśi comž awtorki a awtory awtorske pšawo wobchowaju.

Teksty wózjawjaju se pód licencu Creative Commons Namensnennung 4.0 International. Jolic až póžedaśo sebje ako awtor abo awtorka drugu licencu, ga rozgrońśo se z redakciju, lěc jo to móžno. Pšosym źiwajśo na to, až wobraze a grafiki we Wašych tekstach jano wózjawiś móžomy, jolic ako awtor twóriśelske pšawo maśo abo su se twóriśelske pšawa wam pśepódali.

Wuraznje pokazujomy na to, až jo samoarchiwěrowanje w Lětopisu wózjawjonych tekstow pśez awtorow dowólone. Awtorki a awtory mógu swóje nastawki same archiwěrowaś a w repozitorijach ako arXiv, PubMed Central abo institucionelnych repozitorijow zapołožyś.

Publikaciska etika a zawěsćenje dobreje wědomnostneje prakse

Casopis „Lětopis“ se zawězujo, nejwuše standardy publikaciskeje etiki doźaržaś. Pśi tom źiwa na COPE-Guidelines. Což nastupa awtorstwo a originalnosć, deje pśipósłane źěła se makaś z pśirucenjami DFG k zawěsćenju dobreje wědomnostneje prakse. „Lětopis” wózjawijo jano take źěła, kótarež njejsu se howacej na žednom drugem měsće wózjawili. Dla mócowanja wobeju serbskeju wědomnostneju rěcowu wózjawjaju se how teke pśełožki do dolnoserbskeje a górnoserbskeje rěcy. Wóni su eksplicitnje ako take wóznamjenjone.

Procedura za peer-review

Wšykne teksty Lětopisa se pśez pśisłušnego fachowego redaktora, redakcisku asistencu ako teke šefredaktora redakcionelnje wobźěłuju a pśespytuju.

W rubrice "nastawki a pójadnanja" Lětopisa wózjawjone artikele su dejali proceduru peer-review pśejś a pśi tom pozitiwne pósuźenje dostaś. Redakcija jo wuzwóliła pósuźowarje z rědu eksternych fachowych kolegow. Jano we wuwześnych padach (n.pś. z rěcnych pśicynow, gaž źo wó pśespytowanje tekstow w dolno- abo górnoserbskej rěcy) wuzwólijo wóna kolegi ze Serbskego instituta, kótarež pak njejsu cłonki redakcije. Redakcija Lětopisa wobglědujo pśi wuzwólenju pósuźowaŕkow a pósuźowarjow pšawidła pśedsudkownosći DFG a wuzamknjo wósoby, kótarež by mógli pó stawje wěźenja pśedsudkowne byś, z pósuźowańskego procesa.

Wušej togo dajo teke rubriku „Materialije” (na pśikład za komentěrowane wózjawjenja dokumentow). Teksty z teje rubriki muse jano wuwześnje proceduru peer-review pśejś; wuwześa se wósebnje zapišu. W howacnych rubrikach casopisa (jubilej, wopomnjeśe, recensija, knigłańske pórucenje, konferencne rozpšawy) wótmějo se žeden peer-review.

Redakcija pśilubijo, pó pótrjebje korektury, stajenja, slědkwołanja a zagronjenja wózjawiś.